भिडियो सहित हेर्नुहोस !
Advertisement
‘त्यो नम्बरको रातो–नीलो नम्बर प्लेटको गाडी यातायात कार्यालयमा दर्ता नै छैन,’ ती अधिकारीले कान्तिपुरसित भने । ती अधिकारीका अनुसार सक्कली बा१झ १००९ नम्बरको गाडी
भाद्र १३, २०७४- गृह मन्त्रालयको काम नक्कली गाडी नियन्त्रण गरी कानुनी कारबाही गर्नु हो । तर उल्टै गृह राज्यमन्त्री श्यामकुमार श्रेष्ठले पदमा बहाल भएको दिनदेखि नै फर्जी नम्बर प्लेटको गाडी चढिरहेका छन् । उनले बा१झ १००९ नम्बरको ल्यान्डक्रुजर प्राडो गाडी चढदै आएका छन्, जुन नम्बर फर्जी हो । सक्कली बा१झ १००९ नम्बरको गाडी भने हुलाक विभागसँग छ ।
राज्यमन्त्री श्रेष्ठले चढेको गाडीको वास्तविक नम्बर बा६च १००९ हो । जुन गाडी चमेलिया जलविद्युत् आयोजनाको नाममा वागमती यातायात साना तथा ठूला सवारी कार्यालय एकान्तकुनामा दर्ता छ ।
रातो–नीलो नम्बर प्लेटको बा१झ १००९ नम्बरको गाडी आफ्नो विभाग मातहतमा दर्ता नै नरहेको जानकारी यातायात व्यवस्था विभाग र साना तथा ठूला सवारी कार्यालयका अधिकारीले दिए । ‘त्यो नम्बरको रातो–नीलो नम्बर प्लेटको गाडी यातायात कार्यालयमा दर्ता नै छैन,’ ती अधिकारीले कान्तिपुरसित भने ।ती अधिकारीका अनुसार सक्कली बा१झ १००९ नम्बरको गाडी हुलाक विभागको नाममा छ । ‘एउटै नम्बरका दुई गाडी दर्ता हुनै सक्दैनन्,’ उनले भने । कानुन पालना गराउनुपर्ने र नक्कली गाडी नियन्त्रण गर्नुपर्ने गृह राज्यमन्त्री श्रेष्ठले फर्जी नम्बरको सवारी मात्र चढेका छैनन् कि उनी या उनका चालकले गाडी चलाएका बेला कसैलाई ठक्कर दिएमा, कुनै गैरकानुनी कार्य गरेमा हुलाक विभागमा दर्ता रहेको गाडीका चालक कानुनी फन्दामा पर्ने चिन्ता यातायात कार्यालयका अधिकारीले व्यक्त गरेका छन् । ‘राज्यमन्त्रीको फर्जी नम्बरको गाडी कतै दर्ता छैन, यदि त्यसले ठक्कर दिएमा या अन्य गैरकानुनी कार्य गरेमा वास्तविक नम्बर प्लेटको हुलाक विभागको गाडीका चालक कानुनी फन्दामा पर्नेछन्,’ ती अधिकारीले भने ।
कसरी फर्जी नम्बर ?
गृह राज्यमन्त्री श्रेष्ठको गाडीमा कसरी फर्जी नम्बर राखियो ? गृह मन्त्रालयका प्रवक्ता रामकृष्ण सुवेदी भन्छन्, ‘मलाई थाहा छैन, मन्त्रालयको व्यवस्थापन महाशाखा हेर्ने सहसचिव हरिशरण पुडासैनीलाई थाहा होला ।’ पुडासैनीलाई सोमबार साँझ सम्पर्क गर्न खोज्दा उनको मोबाइल स्विच अफ थियो । स्रोतका अनुसार श्रेष्ठलाई राज्यमन्त्री हुनासाथ रातो नम्बर प्लेटको चमेलियाको बा६च १००९ नम्बरको गाडी चढ्न दिइयो । मन्त्रालयले राज्यमन्त्रीले चढ्ने गाडीमा रातो–नीलो नम्बर प्लेट राख्यो, त्यो पनि यातायात कार्यालयको स्वीकृतिबिनै । गृहले रातो प्लेटको ‘बा६च १००९’ को ठाउँमा यातायात कार्यालयको स्वीकृतिबिनै गैरकानुनी रूपमा फर्जी सरकारी नम्बर ‘बा१झ १००९’ राखेर चढ्न दिएको हो । यसअघि चमेलिया आयोजनाको ल्यान्डक्रुजर प्राडो गाडी तत्कालीन प्रधानमन्त्री माधवकुमार नेपाल, झलनाथ खनाल र पुष्पकमल दाहालले आफ्नो कार्यकालभर यसरी नै फर्जी नम्बर राखेर चढेका थिए ।
श्रेष्ठले कसरी पाए चमेलियाको गाडी ?
श्रेष्ठ ऊर्जा मन्त्रालय मातहतको गाडी चढ्न पाउने भाग्यमानी गृह राज्यमन्त्री हुन् । ऊर्जामन्त्री महेन्द्रबहादुर शाही या विद्युत् प्राधिकरण आयोजनाका कार्यकारी निर्देशक कुलमान घिसिङमध्ये एकले चमेलियाको गाडी श्रेष्ठलाई चढ्न दिएको जानकारी ऊर्जा मन्त्रालय स्रोतले दियो । शाही र श्रेष्ठ एउटै पार्टीका सांसद हुन् भने घिसिङ र श्रेष्ठको गृहजिल्ला एउटै रामेछाप हो । यो गाडी यसअघि प्राधिकरणका कार्यकारी निर्देशकले चढ्थे । राज्यमन्त्री श्रेष्ठ पदमा बहाल भएको दिनदेखि राजधानीको ‘स्वयम्भू पिस होटल’ मा बस्दै आएका छन् ।
