भिडियो सहित हेर्नुहोस !
Advertisement
नेपालीलाई विना इजाजत अपहरण शैलीमा पक्राउ गर्न डोटि पुग्यो भारतीय प्रहरीको टोलि
नेपाल प्रहरीको इजाजत विना नै अपहरण शैलीमा पक्राउ गर्न आएको भारतीय प्रहरीको टोलिलाई जिल्ला प्रहरी कार्यालय डोटिले नियन्त्रणमा राखेको छ । भारतीय प्रहरीका डीएसपी सहितको ७ जनाको टोलीले नेपालीको घरबाट एक नेपालीलाई पक्राउ गर्न डोटि पुगेको छ । डोटि सिलगढी नगरपालिका वडा नम्बर ८ लडागडाका लालबहादुर आउजीलाई बुधबार राति उनकै घरबाट बन्धक बनाएर लैजाने क्रममा प्रहरीले उनीहरूलाई पक्राउ गरेको प्रहरीले बताएको छ ।
भारतीय प्रहरी र तिनका सहयोगीलाई विशेष सुरक्षासहित प्रहरी प्रमुख एसपी डिल्लीराज बिष्टको कार्यकक्षमा राखिएको स्रोतले जनाएको छ । बन्धक बनाइएका आउजी पनि प्रहरी नियन्त्रण मै छन् ।
भारतीय प्रहरीले घटनामा प्रयोग गरेको गाडी प्रहरी कार्यालय परिसरमा त्रिपालले छोपेर राखेको बाहिरबाट देखिन्छ । पत्रकारहरूलाई उक्त गाडीको फोटो खिच्न समेत दिइएको छैन।
लालबहादुर घरमा सुतिरहेका थिए । डोटि कै एक भारतीय प्रहरीसंग आएका एक नेपालीले मध्यरातमा बोलाएपछि लालबहादुरकी श्रीमतीले ढोका खोलेकी थिइन् । एक्कासि भारतीय प्रहरी घरभित्र पसेर कुटपिट गर्नुका साथै लालबहादुरलाई जबरजस्ती गाडीमा बन्धक बनाएर लगेका थिए ।
घटनालगत्तै स्थानीयवासीले लडागडा प्रहरी कार्यालयलाई जानकारी गराएका थिए । स्थानीय प्रहरीले गाडी समात्न नसकेपछि जिल्ला प्रहरी कार्यालयलाई जानकारी दिएको थियो । जिल्ला प्रहरीले आफ्नो कार्यालय अगाडि गाडी नियन्त्रणमा लिई पक्राउ गरेको हो ।
कामको सिलसिलामा भारतमा बस्ने लालबहादुर चार महिनाअघि फर्किएका हुन् । नेपाली प्रहरीसँग समन्वय नगरी उताको प्रहरी आई उनलाई अपहरण शैलीमा रातारात लैजान चाहनुको कारण खुलेको छैन । आफन्तका अनुसार उनलाई हिरासतमा राखिएको छ र कसैलाई भेट्न दिइएको छैन ।
अवैध रूपमा आएका भारतीय प्रहरीलाई एसपीले आफ्नो कक्षमा ससम्मान राखेको र लालबहादुरलाई थुनामा राखेको आरोप उनीहरूले लगाएका छन् ।
प्रमुख जिल्ला अधिकारी एक कार्यक्रमका लागि जिल्लाबाहिर छन् । कार्यालयका प्रशासकीय अधिकृत केशव लामिछानेले आफूलाई यसबारे कुनै जानकारी नभएको बताए । नेपालको सीमाभित्र भारतीय प्रहरी आएर राति अपहरण गर्ने हिम्मत गर्नु सामान्य घटना नभएको अधिवक्ता डन्डीराज ओझाले बताए ।
‘यस घटनाले नेपालको सुरक्षा अवस्था प्रस्ट देखियो, नेपाल प्रहरीको सक्षमतामाथि पनि प्रश्न उठेको छ,’ उनले भने ।
यसअघि २०७३ साल वैशाख १२ गते डोटी र अछामको सिमानामा पर्ने चौखुट्टे क्षेत्रबाट ५ भारतीय प्रहरी अवैध हतियारसहित पक्राउ परेका थिए । समातिएकालाई नेपाल प्रहरीका उच्च पदस्थ कर्मचारीले भारतसमक्ष बुझाएका थिए ।
