भिडियो सहित हेर्नुहोस !
Advertisement
सुकी, अल्पसंख्यक र आतंकवाद
भाद्र ३०, २०७४-सधैंजसो सबैजसो मुलुकको चासोको विषय आतंकवाद र असुरक्षाको प्रसंग नै चीनको स्यामनमा हालै सम्पन्न नवौं ‘ब्रिक्स’ शिखर सम्मेलनमा प्राथमिकताको विषय भएको थियो । त्यहाँ जारी गरिएको स्यामन घोषणापत्रको बुँदा ४८ ले पाकिस्तानस्थित दुई आतंकवादी समूहका साथै विश्वभरि छरिएका अन्य केही आतंकवादी गुटहरूको नामावली ‘ब्रिक्स’का पाँच सदस्य राष्ट्रहरूको प्रति–आतंकवादप्रतिको सामूहिक प्रतिबद्धताको रूपमा उल्लेख गरिएको छ । उक्त सम्मेलनताका उत्तर कोरियाले आफ्नो राष्ट्रिय सुरक्षाकै सुदृढीकरणको निम्ति हाइड्रोजन बम परीक्षण गर्नाले पूर्वी एसियाली मुलुकहरूमात्र नभई विश्व सामरिक संरचनालाई नै खल्बलाउँदै असुरक्षित र आतंकित तुल्याएको छ । उत्तर कोरियाली राज्यव्यवस्था दशकौंदेखि संयुक्त राज्य अमेरिकाबाट प्रताडित र आतंकित हुनुको कारण नै आफ्नो सुरक्षाको निम्ति आणविक अस्त्र सुसज्जित हुनुपरेको त्यहाँको निरंकुश शासकको उक्ति छ । तसर्थ आतंकको उपज भौतिकमात्र नभई मनोवैज्ञानिक त्रासदीबाट पनि हुनसक्छ ।
तर आतंकवाद र आतंकी शब्दलाई भावार्थ दिने र परिभाषित गर्ने कामचाहिंँ सत्ताधारीहरूले नै गर्छन् । किनभने आतंककारी भनाउँदाहरू सत्ताविपक्षी हुन्छन् । त्यसैले प्रतिवादद्वारा राज्य आतंकको वैधानिक एकाधिकारलाई चुनौती दिने गर्छन् । अक्सर सत्ताधारीहरूमा मौलाउने अधिनायकवादी प्रवृत्तिकै कारण मुलुकभित्र कलह सिर्जना हँुदा जनता, त्यसमध्ये पनि अल्पसंख्यकहरूको विचल्ली हुने ऐतिहासिकता छ । अल्पसंख्यकहरू जहिले पनि जहाँ पनि खेदिएका छन् । प्रताडित र पीडित हुनुकै नियतिसित वञ्चितीकरणको चपेटामा परेका छन् । त्यसैले अचेल विश्वभरि नै बाँच्ने अधिकार र समावेशीकरणको अवधारणा प्रमुख राजनीतिक मुद्दा भएको छ । अल्पसंख्यक, त्यसमा पनि मुस्लिम धर्मावलम्बी हुनु नै अचेल केही गैरमुस्लिम राज्यहरूको बक्रदृष्टिमा पर्नुको कारण भएको छ । अल्पसंख्यकलाई दिइने यातना र उनीहरूप्रति गरिने दुव्र्यवहारले विश्व इतिहास रंगिएको छ । द्वितीय विश्वयुद्धताका नाजीहरूले यहुदीहरूप्रति अमानवीय, बर्बर तथा पाशविक व्यवहार गर्नुले बहुसंख्यकद्वारा अल्पसंख्यकको जातीय संहारलाई लेप लगाएको थियो । त्यसबेला नाजीहरूले जसरी यहुदीहरूको उन्मूलन गर्ने अभियान चलाएका थिए, अहिले म्यानमारमा धर्म र नश्ल संरक्षण संख्या (मावथा) कट्टरपन्थी नेताले भिक्षु, भिक्षुणीका साथै बर्मेली बौद्धमार्गीहरूलाई इस्लाम धर्मावलम्बीहरूप्रति त्यस्तै सोच राख्न उक्साएको छ ।
